వింటున్నావా?

పున్నాగ బూరలు ఊదుతూ,
పారిజాతం రాలిపడుతూ
పరిమళం పంచిపెడుతున్నాయి-
ఆవరణ అంతా మేని పులకింతలే.

చిటారు కొమ్మన సీమచింత,
కావేసిన మావిడి పంట
నోరూరిస్తున్నాయి-
చావిడి నిండా చాపిన చేతులే.

గోడ మీదుగా లావాదేవీలు
ఇటు ముంజెలు అటుగా,
అటు మొగ్గలు ఇటుగా మారకం.

ఒప్పులకుప్ప, తొక్కుడుబిళ్ళ
ఆడనంటే చెల్లదక్కడ,
పూలజడ చెదిరితే ఒప్పుకోరిక్కడ
తేలని లెక్కల్లో తెగని ఆరాటం.

మొన్నటి ఊసులు
నిన్నటి ఆశలు
నేటి కలలు
ఏదైతేనేమి
మనుగడకి ఊపిరులు కాదా!?

కంటి కాంతులకి కొదవ లేదు:
మెరుపులు మసకేస్తే
మెరుగులు పెట్టటమే
మాగన్ను కునుకులో జోగటమే, బతుకంతా ఇకపై...

మరలు తిప్పుకుంటూ మళ్ళి పోను,
మమతలెరుగని యాంత్రికత లోకి.
ఎదురీత బారల్లో ఎద నిండా తృష్ణ పీల్చుకుంటా-
వస్తావా మరి నాతో చెయ్యీ చెయ్యీ కలిపి?