చిన్నారి పొన్నారి నా చిట్టి అమ్మలు!!!

పాదులో దాగి పచ్చగా విచ్చిన గుమ్మడిపువ్వల్లే,
పక్కలో ఒదిగి అరమూతల నవ్వింది నా చిన్నితల్లి.
అవ్వాయి తువ్వాయి గెంతులేసే లేగదూడకిమల్లే,
ఆదమరిచి ఆడిపాడింది నా బంగరుతల్లి.

అమ్మ పనికి పోతుంటే,
తోడు నేనంటు మారాముపోయింది.
నాన్న వూరుకి వెళ్తుంటే,
వెంట నేనంటు గారాలుపోయింది.

సరిగమల పాఠాలు ముదమార నేర్వమంటే,
ఆరున్నొక్క రాగాలు ఆలపించింది విపంచి.
తకధిమి నాట్యాలు ఆనంద తాండవమాడమంటే,
మువ్వకొక్క మూతివిరుపుగ చిందులేసింది తరంగిణి.

ఓనమాలు దిద్దుతూనే,
వేయి పలుకులు అమ్మకి పంచింది.
పాలబువ్వ తిననన్న గారాబు బుల్లి,
ముద్ద కలిపి అమ్మ నోటికిచ్చింది.

ఆరిందా తానని అన్నకి ఎదురు తిరిగింది
అమ్మ చిరునామా పేరు మార్చి రాయమంది
చిట్టి పొట్టి చిన్నారి ననుమించి ఎదగనుంది..
చెప్పుకుపోతే వేవేలు, నా చిన్నితల్లికి జేజేలు!!