ఎవరివో?

బొల్లోజు బాబా గారి స్ట్రీట్ చీమలు కదిలించిన స్మృతి
/*******************************************
ఎండలో తడిసిన ఎర్రమందారానివో
వానల్లో పొడారిన ఉమ్మెత్తపూవువో
వెన్నెల్లు వేకువలు యెరుగని వెఱ్ఱిదానివో
రేయింబవళ్ళు రాజుకున్న ఆకలిమంటవో?

ముగ్గురాళ్ళు నీ కండని పిండేసాయో
బండరాళ్ళు నీ కాళ్ళని కరిగించాయో
నీవడుగిడని వీధి వుందో లేదో
నీ గంప దింపని ముగ్గు కలదో లేదో?

నాచేతి చిత్రాలు మా ముంగిలి వైనాలు
పూలగొబ్బిళ్ళ అలరారు రంగవల్లులు
వాడందరికీ తెగ మురిపాలు
మరి నీవి కాదా సగపాలు?

నీవు పంచినదే కష్టంలోని సుఖం
నిన్ను కాంచని శ్రమజీవి దుర్లభం
ఆరణాల వెలకై నీ యాచనానాడు
ఆరంకెలు గడిస్తూ రేపు భయం నాకీనాడు

మిగిలున్నావో, తరలిపోయావో
పేరే చెప్పని నీకు వుంటే ఆ వూరేదో?
ముద్దులొలుకు ఏ ముగ్గైనా నీ రూపేనేమో?
తిరిగి పరిచయం చేయబోను నేనెవరినో నీవెవరివో?
*******************************************/
నా పదేళ్ళ వయసులో తొలిసారి "శ్రమజీవి" అనే కులాన్ని పరిచయం చేసి జీవనంలోని లోతుని తరిచి చూసేలా చేసిన ముగ్గవ్వ - ఒక కంటితో, గ్రహణపు మొఱ్ఱి నోరుతో, వంగిన నడుంతో, ఒక విధమైన వెరపు బ్రతుకు పట్ల కలిగించిన ఆ అవ్వ నాకింకా గుర్తే. ఆ అవ్వ వంటి ఎందరో వృద్దులకి ముసలితనాన కూడా కష్టించే దైన్యాన్ని సహిస్తున్న వేవేల మందికి వందనాలతో ఈ చిరు జ్ఞాపిక.