ఉమ్మడి చరిత్రకారులు

మునిమాపులో ఈ గాలివాన ఊపిన మానస ఘోష

ఈ చిత్రం నా పెరటిలో తీసినది

*** యువతరానికి కొందరు ఆలుమగలు సెట్ చేస్తున్న బాడ్ ఎక్జాంపుల్ ఈ కవితకి ప్రేరణ

లెక్కతప్పిన చుక్కల రంగవల్లిలా
అసంబద్ద కలయిక కాబోలు,
తప్పక పురుడుపోసుకున్న అనుభూతి,
నిత్యం అర్థాకలితో నలిగే అనాథశిశువు,
పరవశాల పాలబువ్వ తెలియని పసికందు.

అసంపూర్తి కల అర్థరాత్రి గాలివానలా,
నిదురలేపి మరీ కలవరపెడుతుంది.
నిరీక్షణలన్నీ తెలవారి రాలిపడిన పారిజాతాలు,
నిట్టూర్పులన్నీ దిగుడుబావి పాకుడుమెట్లు.
ఇరువురూ ముక్తసరి మురిపాల ఆత్మవంచకులు

పణాలు, ఋణాలు, అరణాలు
అనుబంధాలకీ తప్పని బేరసారాలు.
అనుమతులు, బహుమతులు, దిగుమతులు
అనుభూతి తలవొగ్గిన లాంఛనాలు,
మనసారా విజేత, పరాజిత ఒకరి సగపాలు మరొకరు